БИШКЕК, 23-сен. — Sputnik. Борбор калаадан "Манас" аэропортуна чейинки жол толугу менен аяктап, учурда бир жылдык кепилдик мөөнөтү сыналып жатканын Транспорт жана жолдор министри Замирбек Айдаров "Өнүгүү — прогресс" фракциясынын жыйынында билдирди.
Айдаров бул жол бир жылдык кепилдик мөөнөтүнөн жакшы өткөндөн кийин гана кабыл алынып, расмий түрдө эксплуатацияга берилерин айтты.
Ал өз сөзүндө аталган жол капиталдык гана оңдоодон өткөнүн белгилеп, анын 6 сантиметрдей гана катмары сыйрылып, кайра салынганын кошумчалады.
"Бул жолго 954 миллион сом каралган. Толугу менен каржыланып бүттү. Башында биздин жергиликтүү курулушчулар кемчиликтерди кетиргендиктен дагы кошумча оңдоо иштери жүргүзүлөт. Ошондой эле жолдун эки чекесине чырактарды орнотуу үчүн 74 миллион 966 миң сом сурап жатабыз", — деди ал.
Министр учурда кошумча иштерди аткаруу боюнча иштер жасалып жатканын баса белгиледи.
Эске салсак, буга чейин өкмөт башчы Сооронбай Жээнбеков аталган жолдун сапаты начар экенин айтып, аны кайта жасап чыгуу керектигин айткан болчу.
