БИШКЕК, 22-сен. — Sputnik. Жогорку Кеңештин бейшемби күнкү отуруму адегенде эле чыр менен башталды.
Биринчи болуп сөз алган "Бир Бол" фракциясынын депутаты Чолпон Жакупова "КРдин референдуму жөнүндө" мыйзам долбоорун күн тартибинен алып салуу сунушун айтты.
"Урматтуу Чыныбай Акунович, референдум жөнүндө мыйзам долбоорун күн тартибинен алып салалы. Анткени аталган мыйзам долбоору комитетте каралганда мыйзам бузуулар болгону көрүндү. Коомдук талкуу жана экспертизадан өткөн жок", — деп Жакупова төрагага кайрылды.
Ал эми КСДП фракциясынын депутаты Узарбек Жылкыбаев эч кандай мыйзам бузуу болбогонун айтып, маселени күн тартибинде калтыруу талап кылды. Аталган пикирди Иса Өмүркулов да колдоого алды.
"Мыйзам долбоору тармактык комитетте каралган. Мен да катышкам. Демилгечилер экспертизадан өтпөгөндүгү тууралуу регламент бузулганын айткан жок. Бул мыйзам каникулга кетип жатканда караганбыз. Суроолор, түшүнбөстүктөр жок. Маселени жөн эле артка жылдыруунун аракети болуп жатат. Ошондуктан күн тартибинде калтыралы", — деди Өмүркулов.
Чолпон Жакупованын сунушу добушка коюп, 63 депутат каршы чыккандыктан маселе күн тартибинде калды.
