БИШКЕК, 21-сен. — Sputnik. Өзбекстандын утурумдук президенти Шавкат Мирзиёев Жизак шаарынын акимин, бир катар район башчыларын кызматтан алганын Өзбекстан президентинин басма сөз кызматы билдирет.
Мирзиёев өндүрүш, айыл чарбасы жана социалдык чөйрөдө кеңири кулач жайган социалдык-экономикалык реформалардын жер-жерлердеги жүрүшү менен таанышуу үчүн Жизак облусуна 16-сентябрда барган.
"Ошол эле күнү элдик депутаттардын Жизак шаардык кеңешинин сессиясы өтүп, аталган шаардын акими Асрор Кобилов ишинде кетирген олуттуу катачылыктары үчүн кызматтан алынган. Анын ордуна Абдукаххар Тухтаев дайындалган", – деп айтылат билдирүүдө.
Ушундай эле себеп менен Жизак облусунун прокурору, бир катар райондордун акимдери алмашкан. Ал эми 18-сентябрда Ташкентте кышка даярдык, калааны жашылдандыруу маселелери боюнча өткөн өкмөттүн жыйынында Ташкенттин курамындагы Мирзо-Улугбек районунун жетекчилери кескин сынга кабылып, аким Шомансур Ахмедов жана райондук милиция жетекчиси Тимур Нормухаммедов кызматтан алынган.
