БИШКЕК, 19-сен. — Sputnik. "Ата Мекен" фракциясынын лидери Өмүрбек Текебаев президент Алмазбек Атамбаев 2010-жылы апрель, май айларында Кадыржан Батыров менен кеңешип, Жалал-Абадда кадр маселелерин чечип жүргөнүн маалымат жыйында билдирди.
Өз сөзүндө ал убактылуу өкмөттө иштеп турганда Батыров менен бир да жолу жолукпаганын айтты. Муну ошол учурда Жалал-Абадды тескеп турган, учурда камакта жаткан Бектур Асанов дагы тастыктап бере аларын кошумчалады.
"Өзбек коомдорунун лидерлери Бишкекке келип абал боюнча маалымат беришкен. Аларды Эмил Каптагаев Кыргызстан элинин ассамблеясынын имаратында кабыл алган. Андан кийин алар Убактылуу өкмөттү башкарып турган Роза Отунбаева менен да жолуккан. Андан кийин аларды Атамбаев кабыл алганы ошол учурдагы документтерде жазылып турат. Атамбаев алар менен 5-июнда дагы жолугушуу белгилеген. Ал 5-июнда мамлекеттик имаратта эмес, "Форумдун" имаратындагы үйүнө чакырган. Бул жолугушуу менде ачык шек жаратат", — деди Текебаев.
Атамбаевди ошондо өзбектердин "Ватан" деген партиясы шайлоодо колдойбуз дегенин айткан Текебаев, Атамбаев өзбектердин лидерлерине Кадыржан Батыров менен жакшы мамиледе экенин айтканын белгиледи.
"Ата Мекендин" лидери Батыровду ким качырды деген суроонун жообун ушул жерден тапса болорун кошумчалады.
Андан сырткары, ошол учурда Атамбаевге өлкөдөгү саясый туруктуулукту сактоо үчүн бардык укуктар — финансылык, кадрларды дайындоо берилген, эгер бир нерсе болуп кетсе Атамбаев керт башы менен жооп бермектигин айтты.
