БИШКЕК,16-сен. —Sputnik. "Ата Мекен" фракциясынын лидери Өмүрбек Текебаев кайрылуусунда анык бир максаттарды көздөгөнүн көрүүгө болот. Мындай пикирин Бишкек шаарынын мэри Албек Ибраимов депутаттын билдирүүсүнө карата жооп иретинде айтты.
Белгилей кетсек, Текебаев кечээ, 15-сентябрь күнү маалымат жыйын өткөрүп, Алмазбек Атамбаев Кой-Таштагы Максим Бакиевдин улутташтырылбай калган жерин сатып алып, үй салып жатканын билдирген. Ал аталган үйдү Атамбаевке калаа мэри Ибраимов белек кылганын кошумчалаган.
"Аталган жерди 2008-жылы мурунку "Ак жол" партиясынын (Бакиевдин партиясы) мүчөсү, Текебаевдин учурдагы жакын досу Улукбек Ормонов "Дастан" ишканасынан тартып алып, улутташтырган. Анткен менен бир тыйын да төлөгөн эмес. Соттун чечими менен гана 2010-жылы аталган жер "Дастанга" кайтарылган", — дейт ал.
Ибаримов Атамбаевдин үйү курулуп жаткан жер 2012-жылы "Дастан" ишканасы тарабынан Анарбек Укуевге 22 миллион 537 миң сомго сатылганын кошумчалайт.
"Укуев аталган жерди үч жыл колдонуп, мага сатып алууну сунуштады. Мен жерди 2015-жылы сатып алдым. Мэр болгонго чейин бир жыл мурун (2015-жылы) жерди Алмазбек Атамбаевге саттым", — деди Ибраимов.
"Мен ачык айтайын, Текебаев мыйзамсыз иштери чыгып калат деп коркуп жатат. Ошонун арты менен күтүүсүз кадамдарга барып отурганын көрүүгө болот. Ар бир айтылган сөзгө кудай алдында, эл жана мыйзам алдында жооп берүүсү керек. Мен кай бир саясатчыларга окшоп шашылыш билдирүү жасабайм. Бирок Текебаевди сотко берүүнү ойлонуп жатам", — дейт Бишкек мэри.
