БИШКЕК, 13-сен. — Sputnik. Жети килограммдан ашык нашаа менен кармалган жаран КР президентинин аппаратынын мурдагы жетекчиси Медет Садыркуловду өлтүрдү деп издөөгө алынган кишинин иниси экенин Баңгизатка каршы күрөшүү кызматы билдирди.
Маалыматка ылайык, ушул жылдын 10-сентябрында ыкчам-иликтөө иштеринин жүрүшүндө Чүй облусунун Аламүдүн районундагы Новопокровка айылынан Казакстандан чыккан жаран кармалган. Ал жашаган үйдү тинтүү учурунда салмагы 7 килограмм 614 грамм болгон нашаа табылган. Кармалган жаран Медет Садыркуловду өлтүрдү деп издөөгө алынган Рустам Сайдуевдин иниси экени белгилүү болду.
Баңгизатка каршы күрөшүү кызматы алынган маалыматтарга ылайык, Сайдуев 2010-жылы Жаныш Бакиев менен Белоруссияга качып кеткенин кошумчалайт.
Эске салсак, Медетбек Садыркулов 2009-жылы март айында мыкаачылык менен өлтүрүлгөн.
