БИШКЕК, 8-сен. — Sputnik. Ушу тапта Бишкектин алты конушун газ менен камсыздоо иши активдүү жүрүп жатканын Sputnik Кыргызстан агенттигине "Газпром Кыргызстан" ишканасы билдирди.
Компаниянын инвестициялык программасына ылайык, 2017-жылдын соңуна чейин шаардын 22 жаңы конушу менен Мыкан айылына газ берилиши керек.
"Бүгүнкү күндө "Көк-Жар", "Жеңиш", "Салам-Алик", "Кайыңды", "Балбан-Таймаш" жаңы конуштары жана Керамическая жана Бурдинская көчөлөрүндө газ түтүктөрүн орнотуу боюнча иштер жүрүп жатат. Дагы эки конушта түтүктөр орнотулду", — деп айтылат билдирүүдө.
Маалыматка ылайык, "Газпром Кыргызстан" ишканасы көчөлөргө газ түтүктөрүн орнотсо, жашоочулар үйлөрүнө түтүктөрдү өз эсебинен улаштырып алышы керек. Жакынкы эки жыл ичинде аталган компания Кыргызстанга 30 миллиард рублден ашуун инвестиция салмакчы.
