БИШКЕК, 7-сен. — Sputnik. Юстиция министринин орун басары Айбермет Кутуеванын кызматтан алынышы анын Баш мыйзамга болгон позициясына тиешеси жок экенин өкмөттүн маалымат кызматынан кабарлашты.
Буга чейин жалпыга маалымдоо каражаттары юстиция министринин орун басары Баш мыйзамды өзгөртүүгө каршы пикир айткандыгы үчүн иштен алынгандыгын жазып чыккан.
Министрлер кабинетинен кабарлашкандай 2016-жылдын январь айында өз милдеттерин так аткарбагандыгы үчүн премьер-министр тарабынан Кутуевага сөгүш берилген.
Мындан кийин ЖКнын Конституциялык мыйзамдар боюнча комитетинин төрагасы Галина Скрипкина апрель айында Кутуева ээлеген кызматына канчалык деңгээлде татыктуу экенин карап чыгуу сунушу менен премьер-министрге кат жөнөткөн. Ал эми май айында Кутуевага сын пикир айтылган.
Билдирмеде Кутуева өз милдеттерин так аткара албай койгондугу үчүн кызматтан алынганы баса белгиленет.
