БИШКЕК, 5-сен. — Sputnik. Ырчы Сыймык Бейшекеев балбан кыз Айсулуу Тыныбековага арнап чыгарган ырынын бет ачарын 9-сентябрда жасай турганын өзүнүн Facebook социалдык тармактагы баракчасында билдирди.
Бейшекеев балбан кыз Айсулуу менен жолугуп алдыда боло турчу концерттин жүрүшүн, ага жазылган ырдын бет ачарын жана тартыла турган клип тууралуу сүйлөшкөнүн жазды.
"Алтын кыз, билеги эле күчтүү эмес, акылынын күчтүүлүгү менен дагы кубантты. Аман бол, бактылуу бол, алтын кыз, буюруса далай жеңиштер алдыда!!!" — деген пикирин калтырган.
Жаңы чыгарма "Таазим сага, Айсулуу" деп аталат.
Белгилей кетсек, ырчы Бейшекеев буга чейин эгер Айсулуу алтын медаль алса, ага арнап ыр чыгара турганын билдирген эле.
Эске салсак, Рио-де-Жанейродо өткөн Олимпиада оюндарында Айсулуу Тыныбекова 5-орунду камсыз кылган.
