БИШКЕК, 5-сен. — Sputnik. Укук коргоочулар Төлөйкан Исмаилова менен Азиза Абдрасулованын КР президенти Алмазбек Атамбаевдин үстүнөн жазган арызы боюнча угуулар 6-сентябрда Бишкек шаардык сотунда болот.
Бул тууралуу Бир дүйнө — Кыргызстан укук коргоочулардын кыймылы билдирди.
Укук коргоочулар райондук соттун чечимин эми шаардык сотко даттана тургандыктарын айтып, адилеттүү чечим чыкканга чейин күрөшө берерин кошумчалашты.
Белгилей кетсек, өлкө башчысы Атамбаев 14-майда Энелер күнүнө карата уюштурулган салтанатта "Элдик парламенттин" мүчөлөрүн "туруктуулукту бузгусу келген эл бузарлар" деп атап, алардын жыйынына катышкан укук коргоочуларды грантын актагысы келген бейөкмөтчүлөр деп айткан. 12-майда "Элдик парламенттин" жыйыны өтүп, ага укук коргоочулар Абдирасулова менен Исмаилова да катышкан.
Укук коргоочулар Атамбаевдин бул сөзү алардын ар-намысына шек келтиргенин айтып, президенттин кечирим суроосун жана моралдык жактан зыян келтиргени үчүн 20 миллион сом талап кылышкан.
