БИШКЕК, 25-авг. — Sputnik. Филиппиндеги "Абу Сайяф" деп аталган террордук топтун мүчөлөрү мындан бир нече күн мурда барымтага алган 18 жаштагы Патрик Альмодаварды өлүм жазасына тартты. Бул туурасында РИА новости GMA News деп аталган интернет порталга шилтеме берүү менен кабарлады.
"Баланын кесилген башын желим баштыкка ороп, мотоциклчендер жакын арадагы айылдын четине ыргытып кетишкен", — деп айтылат GMA News берген маалыматта.
Кезектеги өлүм жазасы туурасында уккан өлкө президенти тартип коргоо органдарына өлкөнүн түштүгүндө массалык операцияларды жүргүзүп, "Абу Сайяфтын" баш кесерлерин таап, жок кылууну буюрду.
Буга чейин террордук уюмдун чеңгелинен индонезиялык эки балыкчы качып кутулган.
Бул топ жай жарандарды уурдап, акча талап кылып келет. Алар айтылган саатта акчаны бербеген учурда барымтадагы кишинин башын алып койгондугу менен белгилүү. Террорчулар буга чейин Канаданын эки жаранын өлүм жазасына тарткан.
Филиппиндердин басылмаларынын маалыматына караганда, "Абу Сайяф" дагы тогуз индонезялыкты, Малайзиянын беш жаранын, бир норвегиялыкты, бир голландиялыкты барымтада кармап отурат.
