БИШКЕК, 22-авг. — Sputnik. Өкмөттүн бүгүнкү жыйынында Билим берүү жана илим министрлигинин жаңы окуу жылына даярдыгы канааттандырарлык деп табылды. Быйыл өлкөдө 2218 мектеп 1 миллион 091 миң 260 окуучуну кабыл алат. Бул туурасында өкмөттүн маалымат кызматы кабарлады.
"Өкмөттүн жыйынында бала бакчага барган жана мектепке кирер алдында даярдыктан өткөн балдардын саны салыштырмалуу түрдө арбып, 239 690 баланы түзгөн. Былтыр алардын саны 161 380 болгон", — деп билдирди аталган министрлик.
Окуу китептери боюнча маселеде быйылкы окуу жылында мектеп фондусун 11 миллион 695 миң 681 нускада жеткирилгендиги айтылды. Бул жалпы муктаждыктын 79,6 пайызын түзөт деп айтылат министрликтин маалыматында.
Жылдын аягына чейин билим берүүчү 75 окуу жай бүтүп, колдонууга берилмекчи. Ал эми 1-сентябрга карата 98 мектепти капиталдык түрдө оңдоп-түзөө иштери жүргүзүлүп бүттү деп маалымдады министрлик.
