БИШКЕК, 21-авг. — Sputnik. Биз кепке тарткан энелердин экөө тең Жалал-Абад облусунун Сузак районунан болуп чыкты. Бири 13 балалуу Куттия Назарова 70 жашта болсо, экинчиси 11 баланы бутуна тургузган Калбү байбиче 83 жаштын тамагын ичип отурган кези.
"Баатыр Эне" наамын кошкондо 6 миң сом пенсия алган апа
Сегиз кыз, беш уулдун энеси Куттия апа менен азыноолак гана сүйлөштүк. Инсультка кабылып төшөктө жаткан энени көп кыйнабайлы дедик.
"Кызыл-Туу айыл өкмөтүнүн Орто Азия айылында турам. Турмушка 17 жашымда чыккам. Мугалим болуп иштеп жүрүп, пенсияга чыккам. "Баатыр Эне" наамына кошумча берилген акча менен биригип, 6 миң сом пенсия алам.Абышкам да педогог болчу, "Эл агартуунун отличниги" наамы бар эле. Мындан төрт жыл мурун 79 жашында кайтыш болуп кетти. Учурда 31 жаштагы кичүү уулум Тынчтыктын колундамын. Улуу балам 50гө чыкты", — деди Куттия апа.
Биздин маектеш он үч баланын баарын окутуу ал кезде кыйын болгон менен үйдүн да, колхоздун да ишин аткарып жүргөндүгүн кошумчалады.
Куттия апанын Өзгөнгө турмушка чыккан кызы Жылдыз сөзгө аралашып, апасы ооругандан бери кыздары кезек менен карай тургандыктарын кошумчалады.
"Шартыбызга жараша келип бирибиз 10 күн, бирибиз бир ай жүрүп кетебиз. Апам токтоо, жоош, сабырдуу. Азыр 46 небереси, үч чөбөрөсү бар. Апам неберелеринин аттарын алмаштырып алат (күлүп)",— деп айтып берди.
Калбү апа: карда калып, баламдын киндигин өзүм кескен
Он бир баланын энеси Калбү апа балдарды да төрөп, талаада да иштеп, кийин балдарынын баарын жогорку билимдүү кылганын айтып берди.
"Абышкам Турдумамат Кушбаков менен менен 43 жыл бирге өмүр сүрдүк. 77 жашында кайтыш болуп кетти. Беш уул, алты кыздуу болдук. Ал кезде азыркыдай өнүккөн медицина кайдан болсун. Бир баламды кардын үстүндө төрөп, өз киндигин өзүм кескем", — деп айтып берди Калбүбү апа.
Ал тамеки талаада иштеп, мектепте лаборант болуп эмгектенгенин, балдарды жолдошу экөө биргелешип тарбиялагандыгын кошумчалады.
Калбү эненин тогузунчу уулу Автандил кезинде апасы бир эле эмес, үч кайнене менен жашаганын кеп кылды.
