БИШКЕК, 19-авг. — Sputnik. Учурда Бишкектин дүкөндөрүндө помидордун килограммы 90, ал эми былтыр 18 сомдон сатылган.
Ал эми былтыркы жылдын август айында помидор базарда 12 сомдон сатылып келсе, учурда 35 сомдон сатылууда.
Sputnik Кыргызстан агенттигинин кабарчысы дүйнөлүк баа помидорго да жеттиби же кымбаттоонун башка себептери барбы деген сыяктуу суроолорго жооп издеп көрдү.
Айыл чарба жана мелиорация министрлигинин дыйканчылыкты өнүктүрүү саясаты башкармалыгынын башчысы Жигиталы Жумалиевдин айтымында, помидор былтыр канча жерге эгилсе, быйыл деле ошончо аянтка тигилген.
"Былтыр республика боюнча 51 миң гектарга помидор тигилген. Быйыл деле ошончо аянтка отургузулду", — деп билдирди Жумалиев.
Ушул эле министрликтин азык-түлүк коопсуздук бөлүмүнүн адиси Назгүл Ороскожоева баанын кескин кымбатташы гектарлаган жерге эгилген помидорлор жараксыз болуп калганына байланыштуу экенин билдирди.
"Негизи помидор нымдуулукту жактырбайт. Быйыл жаан-чачын көп болгондуктан өсүмдүк ооруга чалдыгып, түшүмдүүлүгү азайып кетти. 50-70 гектар жерге помидор эккен дыйкандар ыйлап жатышат. Нымдуулуктун айынан жашылча түйүлбөй калган", — деп билдирди Ороскожоева.
Бир нече жылдан бери помидор эгип келген Сокулук районуна караштуу Ак-Кашат айылынын тургуну Аруун Калыков аталган жемиш дале быша электигин айтты.
Ал эми агроном Өмүрбек Мамбетов түшүмдүүлүк ар кандай оорулардын пайда болушунан азайып жатканын белгиледи.
"Быйыл жаан-чачын өтө көп болгондуктан нымдуулук болуп, көп жашылчанын түшүмдүүлүгү азайды. Себеби нымдуулук өз чегинен ашып кеткенде жашылчалар ар кандай илдеттерге чалдыга баштайт", — деп билдирди агроном.
Ал эми пияз, картошка, сабиз сыяктуу жашылчалардын азыркы баасы менен былтыркы наркында айырма болгону менен кескин кымбаттоо байкалган жок.
