БИШКЕК, 18-авг. — Sputnik. Үстүбүздөгү жылдын 5-августанда башталган Бразилиядагы жайкы Олимпиада оюндарына Кыргызстандын атынан 19 спортчу аттанган.
Sputnik Кыргызстан агенттигине кыргыз спортчуларын утуп кеткен башка өлкөнүн өкүлдөрү кандай ийгиликтерге жетишкендигине кызыгып көрдү.
Бул тизмекке кыргыз спортчуларын утуп, байгелүү орундарга жеткен гана спортчулар кирди.
Айсулуу Тыныбекова
Эркин күрөш боюнча 58 килограммга чейинки салмактык категорияда килемге чыккан кыздар арасында Айсулуу Тыныбекова бешичин орунду ээледи. Балбан кыз жарым финалда Валерия Кобловага утулса, коло медаль үчүн кармашта индиялык Сакши Маликке алдырып жиберди. Ошентип Сакши Малик коло медаль тагынса, Валерия Коблова күмүшкө жетти.
Арсен Эралиев
Коло медалга бир кадам жетпей калган Арсен Эралиев биринчи эле кармашында кубалык Исмаэл Борреро Молинага утулду. Ал эми кубалык спортчу болсо алдына ат салдырбай, 59 килограм салмактык категориясында алтынды илип кетти.
Жооткотуучу беттеште Арсен Эралиев кытайлык Ван Луминяны жеңсе, коло медалга болгон кармашта өзбек балбаны Элмурат Тасмурадовдон жеңилүү ызасын татты.
Юрий Краковецкий
Дзюдочу Юрий Краковецкий 1/16 финалда немис балбаны Андре Брайтбартаны утса, 1/8 финалда украиналык спортчунун үмүтүнө суу септи. Ал эми кийинки беттишенде Абдулло Тангриевге алдырып жиберди. Анткен менен Краковецкийди жеңип алган өзбек балбаны кийинки кармашында жеңилүү ызасын татты.
Жооткотуучу кармашта болсо Юрий Краковецский кубалык Алекс Гарсиядан жеңилди. Анткен менен Алекс Гарсия коло медаль үчүн болгон беттеште байгесиз калды.
Мурат Рамонов
Грек-рим күрөшү боюнча балбан Мурат Рамонов биринчи эле кармашында атаандашы Сергей Семеновго алдырды. Ал эми россиялык спортчу катары менен жеңип келип, жарым финалда утулуп калды. Анткен менен Семенов мекенине Риодон коло тагынып кайтты.
