БИШКЕК, 16-авг. — Sputnik. Кыргызпатент тарабынан чыкчу "Интеллектуалдык жеке менчик" маалымат бюллетенинин июлдагы санында кыргызстандык илимпоздордун эки жаңылыгы жарыяланды.
Жунушалиева, Борбиева жана Баткибекова аттуу илимпоздор суу тазалоонун жаңы ыкмасы менен койлорду күпкөлөөчү ваннаны сунушташкан.
Маалыматка ылайык, тазалоого сууну топтоп туруп чыпкалоо кирет. Бир литр сууну уулуу металлдардан жана микробиологиялык булгануулардан тазалоо үчүн фармацевтикалык капсула пайдаланылат.
"Фармацевтикалык капсуланыны курамындагы "R" реагент активдештирилген көмүр, кристаллдык йод жана натрий сульфаттан турат", — деп айтылат маалыматта.
Дагы бир жаңылык болуп койлор үчүн көчмө күпкөлөөчү ванна саналат. Авторлору Осмонов, Токтоналиев, Андаева жана Ордобаевдин айтымында, бул түзүлүштүн поршендүү соргучу ваннанын үстүндө орнотулуп, иштетилген суюктукту жугушсуздандыруу үчүн кол аралаштыргычы бар атайын аралаштыргычты камтыйт.
