БИШКЕК, 12-авг. — Sputnik. Бразалияда өтүп жаткан жайкы олимпиадалык оюндарда коло медаль алган кыргызстандык балбан Иззат Артыков француз атаандашынын дооматы ич күйдүлүк экенин Sputnik Кыргызстан агенттигине билдирди.
Белгилей кетсек, Рио Олимпиадасында жетинчи орунду алган франциялык оор атлетчи Бернардин Кингу Матам алдыңкы беш орунду ээлеген балбандардын жеңишинен шек санай турганын айтып, тыюу салынган каражаттарды пайдаланышы мүмкүн деген эле.
"Рио Олимпиадасына барганда дагы анализ тапшырганбыз. Чыкса ошол жактан чыкмак да. Француз балбанынын айткандарын көрө албастык деп айтар элем", — дейт Артыков.
Кыргызстандык спортчу ошондой эле француз атаандашы чабалдык кылганын, даярдыгы жакшы болсо оор салмакты көтөрүүгө кудурети жетмек экенин кошумчалады.
"Ал өзү азыраак машыккан окшойт. Ким канчалык деңгээлде машыкканы оюнда эле билинип калат. Жакшы даярданган киши ийгилик жарата алат", — деди ал.
Кыргызстандык оор атлетчи Иззат Артыков 69 килограмм салмак категориясында коло медалга ээ болгон. Ал жулкуп көтөрүүдө 151 килограммды, түртүп көтөрүүдө 188 килограмм салмакты багындырган. Жалпысынан ал 339 килограммды көтөргөн.
