БИШКЕК, 12-авг. — Sputnik. Рио олимпиадасында коло медаль алган балбан Иззат Артыков өмүр бою мамлекет тарабынан ай сайын 15 миң сом стипендия алат. Бул тууралуу Жаштар иштери, дене тарбия жана спорт агенттигинин статс-катчысы Нуржан Бардинова "Манас" аэропортунда болгон маалымат жыйында билдирди.
Белгилей кетсек, Иззат Артыков 69 килограмм салмак категориясында жалпысынан 339 килограмм салмакты көтөрүп, үчүнчү орун — коло медалга ээ болгон.
Бардинова ошондой эле Иззат Артыков 4 жыл бою мамлекеттен ай сайын жогорку категориядагы стипендия — 45 миң сом ала турганын кошумчалады. Эскертсек, олимпиадада байгелүү орун алгандарга мамлекет тарабынан биринчи орун үчүн 7 миллион, экинчи орунга 5 миллион, үчүнчү орун үчүн 3,5 миллион сом убадаланган.
Москва шаарында өткөн Олимпиадада оор атлетика боюнча чемпион болгон Каныбек Осмоналиев Иззат Артыков байгелүү орун алганда экөө тең көзүнө жаш алып ыйлаганын кошумчалады.
Ал эми коло медалдын ээси Артыков апасы "көчөдө көп жүрбө" деп спортко алып келгенин айтып, алган байгесин кыргыз элине жана апасына арнаганын дагы бир жолу белгиледи.
"Медаль алып жатканда ушул жеңишке жетүү үчүн болгон кыйынчылыктардын баарын эстеп көзүмө жаш алдым", — деди ал.
Алдыда дагы күрөшчүлөр, жеңил атлетчилер жана дзюдочулар болуп 13 спортчу өлкө намысын коргошот.
