БИШКЕК, 7-авг. — Sputnik. Иш издеп жүргөн жаран шылуунга 2200 сомун алдатып жибергенин Бишкек ШИИБ билдирди.
Милицияга Бишкектин 18 жаштагы тургуну кайрылып, июнь айында "Айчүрөк" дүкөнүнүн жанынан бир киши түнкү клубдун бирине жумушка орноштурам деп убада бергенин айтты. Бул "кызматы" үчүн шылуун жигиттин 2200 сомун алып кеткен. Акырында жабырлануучу акчадан да, жумуштан да жок калган.
Свердлов районунун милициясы аталган кылмышка шектүү катары Бишкектин 21 жаштагы тургунун кармады. Учурда тергөө амалдары башталып, анын ушул сыяктуу башка кылмыштарга тиешелүүлүгү текшерилип жатат.
