БИШКЕК, 4-авг. — Sputnik. Премьер-министр Сооронбай Жээнбеков Бишкек—Торугарт (Боом капчыгайы) унаа жолунун коопсуздугу боюнча жыйын өткөргөнүн өкмөттүн маалымат кызматы билдирди.
Аталган жыйынга ИИМ жетекчиси Кашкар Жунушалиев, өзгөчө кырдаалдар министри Кубатбек Боронов, транспорт жана жол министри Замирбек Айдаров катышты.
Эскерте кетсек, үстүбүздөгү жылдын 5-майынан 3-августуна чейин Боом капчыгайында 19 табият кырсыгы катталган. Алардын жетөөсүндө унаа жолдорун таш тосуп калса (бир адам каза болгон), 12 ирет сел жүргөн.
ӨКМ жетекчиси Бороновдун айтымында, Боом капчыгайында 94 сел жүрүүчү жер бар, алардын 17си кооптуу болуп саналат.
Транспорт жана жол министри Айдаров Боом капчыгайындагы суу каптоолордун себебин аныктоо боюнча атайын комиссия иштеп жатканын айтты.
Өз кезегинде Жээнбеков аймактагы кооптуу жерлерди батыраак оңдоо керектигин айтып, туристтердин коопсуздугун сактоо тапшырмасын берди.
