БИШКЕК, 4-авг. — Sputnik. Ысык-Көл облусунун Ак-Суу районунда табылган мамонттун калдыктары ал табылган аймакта жүргүзүлө турган геологиялык изилдөөлөрдүн жыйынтыгы менен чогуу иликтене турганын палеонтолог Айзек Бакиров Sputnik Кыргызстан агенттигине билдирди.
Бакиров мамонттун калдыктары табылган аймакка геологиялык изилдөө жүргүзүлө электигин айтып, сентябрь айында окумуштуулардын тобу Ысык-Көл облусуна барууну пландап жатканын айтты.
"Палеонтологиялык табылга алынган жерди геологиялык жактан да изилдөөгө алыш керек. Буюрса, сентябрда окумуштуулар ал жерге барат. Балким жаңы табылгалар дагы чыгып калышы мүмкүн. Биз бир гана мамонттун сөөгү табылган эле жерди эмес, ошол аймакты толук иликтейбиз", — деди ал.
Окумуштуу табылган мамонттун сөөгү геологиялык изилдөөлөрдүн жыйынтыгы менен чогуу карала турганын айтып, изилдөө иштери качан башталарын так айтуу кыйын экенин кошумчалады.
