БИШКЕК, 14-июл. — Sputnik. Бүгүн Кыргызстанда дүйнөнүн 16 өлкөсүнөн келген 17 этникалык топ катышкан эл аралык конференция башталат. Бул туурасында Дин иштери боюнча мамлекеттик комиссиянын маалымат кызматы билдирди.
Аталган мамлекеттик комиссия иш-чаранын максаты – диний жана маданий көп түрдүүлүктүн, диндер аралык ынтымак менен толеранттуулук идеясын жайылтуу деп билдирди.
Бул конференцияда дүйнөнүн ар кыл бурчунан келген катышуучулар мусулман мечитине, орус православдык чиркөөгө жана синагога храмына алардагы маданият, ыйык деп эсептелген атрибуттар менен жакындан таанышат. Ал жердеги имам, поп же башка дагы диний кызматкерлердин оозунан өздөрү туткан дин боюнча маалымат алышат.
Ал эми өзүнчө иш алып барган секция чыр чатактарды жөнгө салуу жолдорун менен радикализация жана террорчулуктун келип чыгуу себептерин талкуулайт.
