БИШКЕК, 9-июл. — Sputnik. Айрым жарандар үйлөрүн же дарбазаларын сел жүрүү коркунучу күч жерлерге салып, суу каптоо кооптуулугун күчөтүшөт. Бул тууралуу өкмөттүн Ысык-Көл облусундагы өкүлү Асхат Акибаев селден жабыркаган райондорду кыдырып жүрүп айтты.
Буга чейин Чолпон-Атадагы жаңы салынып жаткан ипподромдун жанындагы суу жээгинен чыгып, Балыкчы — Корумду айланма жолунун бир бөлүгүн жууп кеткени айтылган. Мындан тышкары, суу огороддорду да каптап кеткен.
Өкүлчүлүктүн маалымат кызматы учурда сел ташкынынан коргоо боюнча иштер жүрүп жатканын, арыктар үчүн жер камдалганын билдирди.
"Тилекке каршы, айрым тургундар аймактын өзгөчөлүгүн эске албай эле арыктарды тосуп турак жай куруп, дарбаза орното беришет. Мындан улам суу каптоо кооптуулугу жаралат. Учурда калк арасында түшүндүрүү иштерин жүргүзүп жатабыз", — деди Акибаев.
Сапар учурунда Ысык-Көл жана Балыкчыдагы айылдардын суу агызуучу арыктарын кеңейтүү боюнча маселе көтөрүлдү.
"ӨКМдин аймактык бөлүмдөрүнүн кызматкерлери суу каптоонун алдын алуу боюнча аракеттерди көрүүгө милдеттендирилди. Мындан тышкары, абалды көзөмөлдөп туруу үчүн тоолуу райондорго баруу тапшырылды", — деп айтылат билдирүүдө.
Жума күнү аталган кызматкерлер биринчи жолу тоолуу аймакка чыгып кетишти. Учурда Ысык-Көл облусундагы абал туруктуу, кырсык кесепеттерин жоюу иштери улантылып жатат.
