БИШКЕК, 7-июл. — Sputnik. Президент Алмазбек Атамбаев юбилейине карата өзүнүн чыгарган ырларынын топтомун CD-диск кылып жакындарына белек кылууну чечти. Бул тууралуу өлкө башчынын маалымат кызматы билдирди.
Жалпысынан орус тилинде беш ыр жазылды. Аны үн режиссери Эрнист Үмөталиев президенттин иш бөлмөсүндө жаздырып, ага бир сааттай убакыт кеткен. Август айында өлкө башчысы өргүүгө чыкканда кыргызча дагы беш ыр жаздырууну пландап жатат.
"Атамбаевдин ырларына досу кинорежиссер Фуркат Турсунов советтик эски кинолордун айрым бөлүктөрүн алып клип жасайт. Ал даяр болгондо интернетке жарыяланат", — деп жазылат маалыматта.
Ошондой эле Үмөталиевдин суранычы менен Атамбаев жаш режиссер Мирлан Саткымбаевго клип жасоого уруксат берген.
Президенттин маалымат кызматы Атамбаев 2017-жылы жаңы президент шайлангандан кийин мамлекеттик жумуштарды аркалабай турганын жана чыгармачылык менен алектене турганын маалымдады.
