БИШКЕК, 5-июл. — Sputnik. КР каржы министри Адылбек Касымалиев Европанын реконструкция жана өнүгүү банкынын Борбор Азия боюнча жаңы директору Нил МакКейн баштаган делегация менен жолукту.
30 Кулжа 2016, 11:01
Касымалиев Европа реконструкция жана өнүгүү банкы менен Кыргызстандын алакасынын жакшы деңгээлге чыгып жатканын баса белгиледи. Андан сырткары, акыркы учурда өлкө жетекчилигинин парламенттик демократия, инвестициялык абалды жакшыртуу жана ишкерлерге шарт түзүү боюнча жакшы аракеттерди жасап жатканын айтты.
Жолугушууда тараптар электр энергиясы, чакан шаарлардын жана муниципалитеттердин инфраструктурасын өнүктүрүү боюнча долбоорлорго кол коюуга карата жасалып жаткан аракеттерди талкуулашты.
Европа реконструкция жана өнүгүү банкы "Ошэлектрону" жаңылоого (5 миллион евро) жана "Жалал-Абад тазалык" ишканасынын (8,95 миллион евро) катуу калдыктарды жок кылуу долбоорун ишке ашырууга каражат бөлүүгө даяр экенин билдирди.
Касымалиев ошондой эле энергетика артыкчылык берилген тармак экенин айтып, бул жаатта өлкө кызматташууга даяр экенин айтты.
