БИШКЕК, 5-июл. — Sputnik. Чечен республикасынын башчысынын милдетин аткаруучу Рамзан Кадыров Түркияда жашынган чечен террористтерин Россияга өткөрүп берүүнү Анкарадан суранды.
"Эгер түрк бийлигине террористтер тууралуу маалымат керек болсо, дагы бир ирет алардын атын атайм. Жазып алгыла! Тархан Газиев, Ахмад Умаров, Ахмад Патаев, Ширвани Басаев, Махран Саидов, Ризван жана Усама Якубовдор, Асланбек Вадалов, Мовсар Чатаев, Хади Аласханов, Рустам Наурбаев, Ширвани Басаев. Алардын жетекчиси Мовлади Удугов. Булар Түркияда өздөрүн эркин сезип жүрүшөт", — деп Кадыров өзүнүн Insagram баракчасына жазып чыкты.
Саясатчы жогоруда ысымдары аталган чечен жарандары коркунучтуу экенин Анкарага бир нече ирет эскертип, аларды өткөрүп берүүнү суранганын айтат. Бирок ал жооп катары бир гана куру "убадалар" берилип келгенин баса белгилеген.
Кадыров чечен эли миңдеген адамдардын өмүрү аркылуу терроризмди жок кылганын белгилеп, бирок өлкөдөн качып кеткен согушкерлер чет элде эркин жүрүп турганда көйгөй чечилди деп айтууга болбой турганын кошумчалады.
