БИШКЕК, 5-июл. — Sputnik. Медина шаарында жайгашкан пайгамбардын мечитине жакын жерде дүйшөмбү күнү жардыруу болуп, бир жанкечти менен коопсуздук кызматынын төрт кызматкери көз жумган. Араб жана ислам дүйнөсүндөгү мамлекеттердин башчылары терактыны дароо айыптап чыгышты. Бул тууралуу РИА Новости SPAагенттигине шилтеме берүү менен жазып чыкты.
Түркиянын президенти, Йемендин өкмөтү, Палестина, Катар, Оман жана Пакистан өлкөлөрүнүн башчылары катуу билдирүүлөрүн таратты.
Египеттин тышкы иштер ведомствосу террористтердин дини болбой турганын айтты.
"Терроризмдин дини дагы, башка ишеними дагы болбойт. Аларда адамдык касиет деген жок. Аларга каршы туруу үчүн дүйнөнү биригүүгө чакырабыз", — деп айтылат мекеме тараткан билдирүүдө.
Күч кызматкерлери билдиргендей жан кечти мечиттин аймагына өтүүгө аракет жасаган. Бирок ал курчоого алынгандан кийин денесине байланган жардыргычты иштетип жиберген.
Белгилей кетсек, буга чейин Эль-Катиф шаарындагы мечитке жакын жерде дагы бир жан кечти өзүн-өзү жардырып жиберген. Анда жай турмуштагы жарандар жабыркаган эмес.
