БИШКЕК, 4-июл. — Sputnik. Кайгуул милиция башкармалыгынын издөө бөлүмүнүн кызматкерлери бир жаштагы кызды тебелеп, окуя болгон жерден качып кеткен айдоочуну кармашканын аталган мекеме билдирди.
Маалыматка ылайык, 3-июлда болжол менен саат 17.00 чамасында "Дордой" жаңы конушунда 29 жаштагы айдоочу Toyota Wish үлгүсүндөгү автоунаасын буруп жатып, жолдун четинде турган бир жаштагы кызды көрбөй калган.
Наристе окуя болгон жерде каза болгон. Кыздын чоң энеси небересин бир азга таштап, үйгө киргенин айтат.
Ыкчам иликтөө иштеринин жыйынтыгында изи сууй электе Аламүдүн районунун тургуну кармалган. Ал короодон чыгып жатканда бир нерсени тебелегенин, бирок ал куурчак го деп машинадан чыкпаганын айткан.
Кайгуул милициясы ата-энелерге балдарды кароосуз калтырбоо боюнча эскертүү берип келет.
