БИШКЕК, 1-июл. — Sputnik. Мэриянын "Тазалык" ишканасы борбор калаа Бишкекти көрктөндүрүү иштерин улантып жатканын муниципалитет билдирди.
Маалыматка ылайык, учурда Медеров, Тыныстанов, Москва, Горький, Чолпон-Ата, Орозбеков, Жибек Жолу, Токомбаев, Байтик баатыр көчөлөрүндөгү жол жээкте өскөн бадалдар, чөптөр кыркылып, тазаланып жатат. Иштер таң эртеден башталууда.
Ал эми көчөлөрдү жууп-тазалоого тогуз атайын унаа тартылган. Муну менен бирге "Тазалык" ишканасынын кызматкерлери эртең менентен баштап графикке ылайык көчөлөрдү шыпырып тазалоо менен алек.
