БИШКЕК, 27-июн. — Sputnik. "Дордой" базарында жайгашкан зер дүкөндү карактап кеткен жаран кармалганын Бишкек ШИИБ билдирди.
Маалыматка ылайык, окуя үстүбүздөгү жылдын 14-мартында болгон. Чак түштө болжол менен 25-30 жаштардагы беткап кийген белгисиз адамдар сатуучуну тапанча менен коркутуп, 50 миң сомун жана 7 миллион 945 миң 100 сомдук кымбат баалуу жасалгаларды алып кетишкен.
"Каракчылар дүкөндөн төрт планшет, 216 алтын шакек, 108 сөйкө, алтын билериктерди алып кетишкен", — деп айтылат билдирүүдө.
Аталган кылмышка шектүү катары Жалал-Абад облусунун 30 жаштагы тургуну кармалды. Милиция кызматкерлери анын буга чейин соттолуп чыкканын аныктады. Учурда бул боюнча кылмыш иши козголуп, тергөө амалдары башталды.
