БИШКЕК, 27-июн. — Sputnik. Германиянын жаратылышты сактоо союзунун (NABU) "Барс" деп аталган атайын тобунун адистери Кызыл китепке киргизилген сейрек кездешүүчү жаныбарды өлүмдөн алып калышты.
Буга чейин айрым маалымат каражаттарында Кочкор районун Дөң-Алыш айылында 4-класстын окуучусу Эмил уулу Мырзабек иттердин жардамы менен мадыл кармап алып, аны жергиликтүү мергенчиге алып келип бергени айтылган. Аңчы аны мектептин зоологиялык музейине өткөрүп берген.
NABU тобунун адиси Курманбек Дүйшеевдин айтымында, музейдин жетекчиси мадылдын Кызыл китепке киргизилгенинен улам аны эркиндикке чыгаруу үчүн тоого барган. Адистер бул тууралуу Интернет аркылуу билип, шашылыш Кочкорго келишкен.
"Музейдин директору мадылды кайсы жерге таштаганын айтып берди. Издеп таап алдык. Бирок жаныбардын саламаттыгына бир топ доо кеткен экен", — деди Дүйшеев.
Ал жаныбар NABU бирикмесинин реабилитациялык борборуна жеткирилерин белгилеп, ага ветеринарлар кам көрө турганын айтты. Дарылоодон өткөндөн кийин мадыл эркиндикке кое берилет.
