БИШКЕК, 27-июн. — Sputnik. Ош шаарында төрт бөлмөлүү үй күйүп кеткенин Өзгөчө кырдаалдар министрлиги билдирди.
Маалыматка ылайык, үстүбүздөгү жылдын 25-июнуна караган түнү саат 01:01 чамасында Ош шаарынын Касымов көчөсүндө жайгашкан турак үйдө өрт чыккан. Тилсиз жоо өрт өчүрүүчүлөр тарабынан саат 02:45де толук өчүрүлгөн.
"Кырсыктан үйдүн чатыры, төрт бөлмөсү, анын ичиндеги үч сыналгы, эки муздаткыч, 10 килем, 30 жууркан-төшөк, аристон жана жумшак эмерек күйүп, бөлмөдө бир газ баллон жарылган", — деп айтылат маалыматта.
Мындан сырткары, үй ээлеринин айтуусу боюнча үйдө сакталган 250 миң сом акча күйүп кеткен.
Кырсыктан жабыркагандар болгон эмес. Ош шаардык ички иштер башкармалыгынын кызматкерлери териштирүү иштерин жүргүзүшүүдө.
