БИШКЕК, 26-июн. — Sputnik. Футбол боюнча Кыргызстан чемпионатынын 13-турунун алкагында (Топ-лига) "Дордой" менен "Алай" командалары учурдагы алдыда келе жаткан Бишкектин "Алга" командасын такымдап келе жатат. Бул тууралуу КРдин Футбол лигасы билдирди.
Чемпионатта бардыгы болуп жети команда ойноп жатат, ар бир турда бир команда эс алып турат. Өлкөнүн вице-чемпиону болгон "Дордой" командасы 1:0 эсеби менен "Абдыш-Ата" командасын утуп алган. Ал эми учурдагы чемпион Оштун "Алайы" 4:2 эсеби менен Нарындын "Ала-Тоо" командасын жеңип алган. Куршабдын "Алдиер" командасы "Кара-Балтанын" үстүнөн 5:1 эсеби менен жеңишке жеткен. Үч оюн тең ишемби күнү өттү.
"Алга" командасы бир турга катышпай калганына карабастан, топтогон 27 упайы менен сап башында калды. "Дордой" менен "Алай" командаларынын куржунунда учурда 26дан упай бар. Тизменин акырында болгону үч упай топтоого жетишкен "Кара-Балта" командасы келе жатат.
