БИШКЕК, 24-июн. — Sputnik. Улуу жазуучу Чыңгыз Айтматовдун жип жана мыктан жасалган чоң портрети 23-июнда болгон аукциондо 88 миң сомго сатылганын анын автору Азамат Жаналиев Sputnik Кыргызстан агенттигине билдирди.
Жаналиев жазуучу тирүү болгондо быйыл 88 жашка чыкмактыгын эске алып, анын баштапкы баасын 88 миң сом деп баалаган болчу.
Аукциондун жүрүшүндө портреттин баасы соодалашуусуз эле баштапкы наркына сатылганын Жаналиев кошумчалады.
"Сүрөттү мекенчил байкелерибиздин бири Элмурат Алимкулов сатып алып, аны Чыңгыз Айтматовдүн үй-музейине бере турган болду. Эмгегимдин Айтматовдун музейинде турушу мен үчүн да чоң сыймык", — дейт ал.
Сүрөттү сатып алган ишкер Алимкулов маалыматтардан Айтматовдун үй-музейин кышында жылытуу үчүн көп акча кетерин, аны төлөөдө музейдин жамааты кыйналарын угуп, кыш мезгилинде жардам берүүнү колго алганын Sputnik Кыргызстан агенттигине билдирди.
"Кышында музейди жылытуу үчүн көп каражат кетип, аны төлөөдө кыйынчылыктар бар экенин окуп калгам. Андыктан кыш мезгилинде музейди жылытууга кеткен каражатты төлөп берүүнү өзүмө алдым", — дейт Алимкулов.
Жаналиев аукциондон түшкөн каражатты "Улуу кыргыз изи" долбоорун ишке ашыруу үчүн колдонорун билдирди. Ал Үркүн окуясынын 100 жылдыгына карата 14 күн бою ата-бабалардын бир кылым мурда басып өткөн жолун кайталай турганын билдирген эле.
