БИШКЕК, 23-июн. — Sputnik. Премьер-министр Сооронбай Жээнбеков Баткенге жасаган иш сапарынын алкагында республикалык маанидеги "Көк-Таш — Ак-Сай — Тамдык", "Чорго — Миң-Булак — Ак-Сай", "Ак-Сай — Рават", "Кулунду — Максат" жолдорунун абалы менен таанышканын өкмөттүн маалымат кызматы билдирди.
Өкмөт башчы аталган жол тилкелеринин курулушунун жүрүшүн канааттандыраарлык деп белгилеп, аткарылып жаткан иштердин сапатына басым жасап, курулушту белгиленген мөөнөттө аяктоо тапшырмасын берди.
"Бул жолдордун курулушу өлкөнүн транспорттук көз карандысыздыгын камсыздайт", — деди премьер.
Транспорт министрлигинин маалыматына ылайык, курулушту каржылоо маселесинде көйгөйлөр жок. Иш графикке ылайык жүргүзүлүп, өз мөөнөтүндө бүткөрүлөрү белгиленди.
Жээнбековду өзгөчө кырдаалдар министри Кубатбек Боронов, айыл чарба жана мелиорация министринин милдетин аткаруучу Турдуназир Бекбоев, Архитектура, курулуш жана турак жай коммуналдык чарбасы мамлекеттик агенттигинин директору Турдубек Мамбетов, өкмөттүн чек ара маселелери боюнча атайын өкүлү Курбанбай Искандаров жана өкмөттүн Баткен облусундагы ыйгарым өкүлү Жеңиш Раззаковдор коштоп жүрөт.
Эртең, 24-июнда, премьер-министр "Көк-Талаа — Пүлгөн" унаа жолунун ачылыш салтанатына катышат.
