БИШКЕК, 23-июн. — Sputnik. Казакстандын Алматы облусунда жол кырсыгы катталып, андан төрт кыргызстандык жаран каза болгонун "Новости-Казакстан" агенттиги Ички иштер департаментине таянуу менен жазып чыкты.
Кырсык Алматы — Астана унаа жолунун 385-чакырымында, башкача айтканда Алматы, Жамбыл жана Караганда облустарынын чектешкен жеринде болгон. Андан каза болгон төрт кишинин үчөө кичинекей бала экени айтылууда. Дагы төрт жабырлануучу Приозерск шаарынын ооруканасына жаткырылды.
"Учурда окуя болгон жерде ыкчам-иликтөө иштери жүрүп жатат. Азырынча Mercedes Vito микроавтобусу менен Setra үлгүсүндөгү автобус кагышып кеткени белгилүү болду. Бустун ичинде Кыргызстандын жарандары болгон. Эки жүргүнчү ошол эле жерден каза болсо, дагы экөө ооруканага жеткенде көз жумган", — деп айтылат маалыматта.
Учурда КРДин Тышкы иштер министрлиги кырсыктын чоо-жайын аныктап жатат.
