БИШКЕК, 22-июн. — Sputnik. Жогорку Кеңешке өкмөттүн жаңы түзүмү эле келет, же түшүмүнөн кабар жок. Мындай пикирин депутат Рыскелди Момбеков парламентте премьер-министр Сооронбай Жээнбековдун өкмөттүн түзүмүн өзгөртүү боюнча сунушу каралып жатканда билдирди.
Депутат канчалаган өкмөттүн түзүмдөрү өзгөргөнү менен майнап чыкпай жатканына нааразы.
"Бут эле кирет, бут эле кирет, куттан кабар жок деп куудулдар айткандай, өкмөттүн жаңы түзүмү эле келет, түзүмү эле келет түшүмүнөн кабар жок. Буга чейин өзгөрүүлөрдү жасап эмнеге жеттик? Энергобарондор энергетика министрлигин жеп жуткан. Биз андайга жол бербешибиз керек. Өзгөрүү болгон соң жылыш да болушу керек", — деди Момбеков.
Эске сала кетсек, аталган маселе ЖКнын тармактык комитетинде колдоо тапкан.
Парламентте отурум уланып жатат.
