БИШКЕК, 18-июн. — Sputnik. Жалал-Абад облусунун Аксы районунда 17-июнда болгон жаратылыш кырчыктарынын кесепетин жоюу боюнча аракеттер көрүлүп жатканын ӨКМ билдирди.
Маалыматка ылайык, Ак-Жол айыл аймагына караштуу Ак-Жол дарыясынан келген сел суулары Шынаа айылындагы 74 кожолук күндө колдонуп келген көпүрөнүн түркүктөрүн алып кетип, көпүрө авариялык абалга келген. Бул көпүрө 2008-жылы ашар жолу менен курулган.
Ал эми Жолборсту жана Бел-Өрүк айылдарындагы 216 кожолукту айыл өкмөттүн борбору менен байланыштыруучу 9 чакырым ички чарбалык автожолдун беттерин жууп, айрым жерлерин колоттордон келген сел суулары аң-сайга айландырып, жол каттамы токтоп калган. Айыл өкмөт тарабынан эксковатор тартылып, тазалоо жумуштары жүрүүдө.
Белгилей кетсек, акыркы аптада өлкө аймагында нөшөрлөп жааган жаандан улам дарыялардын деңгээли көтөрүлүп, айрым аймактарда сел жүргөн. Нарын, Чүй, Талас, Ысык-Көл облустарындагы бир катар аймактар жаратылыш кырсыгынан жабыр тарткан болчу.
