БИШКЕК, 17-июн. — Sputnik. Бишкек шаарынын мэри Албек Ибраимов борбор калаанын чет-жакасында видео жана фото каттоо камераларын орнотуу сунушун айтты. Бул тууралуу мекеменин маалымат кызматы билдирди.
Мэриянын жыйындар залында ИИМ менен жергиликтүү бийлик органдарынын системаны ишке киргизүү боюнча биргеликте алып бара турган иш-чаралары талкууланды. Буга чейин күч түзүмдөрү "Коопсуз шаар" долбоору жергиликтүү өзүн-өзү башкаруу органдарынын жардамы менен ишке ашарын маалымдаган.
Бишкек шаарынын мэриясына "Заманбап унаа токтотуу" пилоттук долбоору үчүн бир тилкени тандап, ал жерге 6 аппараттык-программалык комплекс орнотуу сунуш кылынды.
Албек Ибраимов шаарга кире бериш жерге камераларды орнотуу зарылдыгын калаага бир күндө 100дөн 200 миңге чейин автоунаанын кириши менен түшүндүрдү.
Ал укук коргоо органдарына колдоо көрсөтүүгө даяр экенин айтып, мыйзам бузгандар менен күрөшүү системасынын жакшырышына жардам берерин белгиледи.
