БИШКЕК, 17-июн. — Sputnik. Бишкектеги Курманжан датка менен Лев Толстой көчөлөрүнүн кесилишиндеги жер оюлуп, ага КамАЗ түшүп кеткенин окуяга күбө болгон окурман билдирди.
Анын айтымында, бул бир апта ичинде жерге түшүп кеткен үчүнчү унаа болууда.
"Мурун жакшынакай эле жол болчу. Түтүктөрдү орнотуу үчүн казып кайра жасагандан кийин эле ушундай болуп калды. Жүк ташуучу унаалар жакшы эле өтүп жатчу, эми минтип жерге түшүп кетип атышат", — деди күбө.
Окуянын башка күбөлөрү дал ушул жерге бир нече унаа жерге кирип кеткенин тастыкташты.
"Буга чейин ЗиЛ менен "Мерседес" микроавтобусу кулап кеткен. Жолду кантип жасаганы түшүнүксүз. Жакшыраак жасап койсо болбойт беле?" — дешти нааразылангандар.
Кайгуул милициясы жол кырсыгы боюнча маалымат түшө электигин, окуянын чоо-жайы боюнча кийинчерээк маалымат берилерин билдирди.
