БИШКЕК, 16-июн.— Sputnik. Талас шаарына Бишкектен иш сапар менен жөнөгөн борбордогу коммерциялык банктын кызматкери Мирлан Токтошев 1,5 жашар наристени ажалдын оозунан сактап калам деген оюна да келген эмес. Аталган банктын башкы кеңсесинин кредит башкармалыгынын башкы адиси Токтошев Sputnik Кыргызстан маалымат агенттигине баланы агып бара жаткан жеринен алып чыгып, өлүмдөн кантип арачалап калганын айтып берди.
Окуя 13-июнь күнү Талас шаарында банк иштери менен кардарларды кыдырып жүргөндө, түшкө маал болгон. Каналда агып келе жаткан куурчакты байкап, анан көз ирмемде бала экендигин түшүнгөн соң, автоунаадан атып чыгып, сууга секирген.
"Мен оң тарапта отурган элем. Алгач куурчак экен деп ойлодум, анан жакшылап карасам бала экен. Дароо эле айдоочуга токтот деп кыйкырып, түшө калып сууга кирдим. Алып чыксам көзү аңтарылып, көпкөк болуп калыптыр. Жасалма дем алдырып, жүрөк тушун укалай баштадым", — деп айтып берди Токтошев.
"Жасалма дем алдырып, бутун созуп, көмкөрөсүнөн жаткырып, укаладым. Оозунан-кулагынан суу чыкты, бирок наристенин жүзүнөн жашоонун белгиси көрүнбөйт. Кайра-кайра жасалма дем алдырып жатып, анан көзүн ачкандай болду. Чакырган Тез жардам кечиккендиктен машинага салып алып, оорукана алып жөнөдүк", — деп айтып берди Мирлан жооптуу ирмемдерин эстеп.
Баланын денесин бошотолу деп көйнөктөрүн тытып жибердик
Баладан тирүүлүктүн белгиси байкалбаган ирмемдер, кылым болуп кеткен ошол мүнөттөр туурасында Таластагы аталган банктын филиалынын кызматкери Айдар Көчөрбаев төмөнкүчө айтып берди.
"Өңү купкуу, куурчак биякта калсын. Баланын денесин бошотолу деп көйнөктөрүн чечип, топчусу жок кийимдерин кол менен тытып жибердик. Шалактап калыптыр. Жан-алакетке түшүп калдык. Мирлан Заирбекович (Мирлан Токтошев — ред.) жүрөк тушун, артынан өпкө тушун укалап, дем алдырууга аракет кылды. Бир топко чейин майнап чыккан жок. Эл чогулуп калган. Бир убакта бала ыйлап жибергенде жеңилдене түшүп, "өх-хх" дедик", — деп айтып берди Көчөрбаев.
Чакырган Тез жардамды жолдон кезиктирип, Токтошев бала менен кошо каретага түшүп, облустук ооруканадагы дарыгерлердин колуна тапшыргандан кийин гана эс алгандыгын айтып берди.
Ажалдан аман калган 1,5 жашар бөбөк Амир Керезбеков — үйдүн кенжеси. Апасы Жылдыз Чыныбаева ошол эле аймактагы бала бакчада иштейт.
"Бала бакчада иштейм. Амирден улуу дагы эки балам бар. Бир аз тумоолоп калгандыктан бир нече күндөн бери үйгө калтырып кетип жаткам. Эмне дейин, Мирлан байкеге абдан чоң ыраазычылыктан башка эч нерсе айта албай турам", — деди Чыныбаева.
Талас облустук биргелешкен оорукананын дарыгери бала бул жайга оор абалда түшкөндүгүн билдирди. Ага медициналык жардам көрсөтүлүп, абалы жакшы болуп калгандыктан, үйүнө чыгарылганын айтты.
Каарман банкирлерге сыйлык тапшырылды
Мирлан Токтошев Өзгөн районунун Салам-Алик айылында төрөлүп, Ош мамлекеттик Университетин бүтүргөн. Бишкек шаарындагы коммерциялык банкта иштегендигине 10 жылга чукулдап калды.
