Үркүндүн 100 жылдыгына карата 3374 адам мунапыс алышы мүмкүн

БИШКЕК, 15-июн. — Sputnik. Жогорку Кеңеште Үркүндүн 100 жылдыгына жана эгемендиктин 25 жылдыгына байланыштуу мунапыс жарыялоо демилгеси көтөрүлдү. 

Мыйзам долбоору кабыл алынса 3374 адамга мунапыс жарыяланат. Анын ичинде 11 эрезеге жетелек бала, 10 майып бар. Мындан сырткары, 1267 адам — анчалык оор эмес кылмыш жасагандыгы үчүн соттолгондор, 1862 адам — биринчи жолу өтө оор эмес кылмыш жасагандар. Ал эми оор жана өзгөчө оор кылмыш жасаган адамдарга карата мунапыс колдонулбайт.

Долбоорго ылайык, беш жылга чейин соттолгон жашы жете элек балдар, 60 жаштан ашкан эркектер жана 55 жаштан ашкан аялдар, I жана II топтогу майыптар, экиден кем эмес жашы жете элек балдары же I жана II топтордогу майып балдары бар үй-бүлөдө жалгыз багуучу болуп саналган адамдар, чоң коркунуч келтирбеген жана анча оор эмес кылмыштар үчүн соттолгон адамдар бошотулушу шарт.

Аталган мыйзам долбоорун депутаттар Мыктыбек Абдылдаев, Мирлан Жээнчороев, Чолпон Султанбекова, Айбек Алтынбеков, Мирлан Бакировдор демилгелешти.

Талкуу жүрүшүндө мыйзам долбоорунун ченемдерин дагы бир ирет кылдат карап чыгып, экинчи окуу жүрүшүндө тиешелүү оӊдоолорду киргизүү зарылдыгы айтылды.

Белгилей кетсек, Кыргызстан эгемендик алгандан берки 25 жыл аралыгында 19 мунапыс кабыл алынган.