БИШКЕК, 15-июн. — Sputnik. Афганистан өкмөтүнүн аскерлери өлкөнүн чыгышында өткөн аскерий операция учурунда "Ислам мамлекетинин" 21 согушкерин жок кылды. Бул туурасында маалымат Афганистандын Коргоо министрлигинин сайтында жарыяланды.
Аскердик операция Пакистан менен чектешкен аймактагы Нангархар провинциясында өтүп, анда негизинен авиация менен артиллерияны колдонушкан. Мындан сырткары Герат провинциясында "Аль-Каиданын" үч террорчусун жок кылышкан.
Акыркы убакта Афганистанда кырдаал бир топ начарлап кетти. Буга чейин өлкөнүн элет жеринин көп бөлүгүн ээлеп алган "Талибан" кыймылы учурда ири шаарларга басым жасап жатат. Мындан тышкары, мамлекетке "Ислам мамлекети" террористтик тобунун таасири да жайылууда.
