БИШКЕК, 14 июн — Sputnik. Эмен бактары мителерге каршы дарыланбай тургандыгын тууралуу Sputnik Кыргызстан агенттигине "Зеленстрой" ишканасынын башкы агроному Сергей Кравер билдирди.
Бишкекте эмен бактары мителердин массалык чабуулуна кабылды. Тургундар эмен бактарынын жалбырактары саргайып, жерге түшүп жатканын байкашкан.
Бишкек шаарынын көптөн берки тургуну Ороскул Жумабековдун айтымында, убагында эмендердин жашыл жалбырактары шумдуктуудай кооз болгон. Бактын алды күз мезгилине чейин салкын болуп турган.
"Азыр болсо байкуш эмендердин жалбырактары күзгө жетпей түшүп жатат. Адегенде дарактар картаят дечи. Эсимде 70-жылдары массалык түрдө дарактарды кыюу иштери болгон. Бирок эмендердин азыркыдай абалын мен эч качан көргөн эмесмин", — деп билдирди бишкектик жаран.
Ал белгилегендей учурда шаардагы дарактарга тиешелүү деңгээлде көңүл бурулбай келет.
Мэриянын адиси эмендердин жашыл жалбырактарын мите курттар жеп жатканын айтат.
"Эмендер алты-жети жыл мурун ооруй баштаган. Негизи мителердин бул түрү дарактарга коркунучтуу зыяны келтирбейт. Болгону дарактын иммунитетин начарлатат. Мындай нерсе өсүмдүктү алсыздандырып, башка мителерге туруксуз кылып коет", — деп билдирет Кравер.
Анын айтымына караганда борбордо 50дөн 70 миңге чейин эмен бактары өсүп жатат. Алардын ичинен шаардын борборунда жайгашкандары мителерден жабыркоодо.
"Митенин бул түрү Кыргызстанга кайдан келгени белгисиз. Бирок анын буга чейин бизде учурабаганы факт. Ал эми эмендерди дарылоого багытталган иш-чаралар боюнча эртең мэрияда маалымат жыйын өткөрүлүп, толук маалымат берилет", — деп кошумчалады агроном.
"Жыйында эмендердин саламаттыгы тууралуу маселелер талкууланат. Биз бардык жарандар сыяктуу эле адистерден жооп алгыбыз келип турат", — деп билдирди мэриянын маалымат кызматынын жетекчиси Гуля Алмамбетова.
Эмен митеси — Россиянын европа бөлүгүндө, Украина жана Батыш Европада кездешет. Митенин курттары эмендин жалбырактарында жашайт.
