БИШКЕК, 8-июн. — Sputnik. Мамлекеттик мүлктү башкаруу фонду (ММБФ) "Эйр Кыргызстан" компаниясынын 49 пайыз мамлекеттик акциясын инвестициялык конкурска койгонун фонддун маалымат кызматы билдирди.
ММБФтин маалыматы боюнча компаниянын менчигинде миң чарчы метрден ашык жерде имараты бар. Уставдык капитал 393,7 миллион сомду түзөт.
"Эйр Кыргызстан" ААКтын 49 пайыз мамлекеттик акциясынын баштапкы баасы 188,9 миллион сомду түзөт", — деп айтылат билдирүүдө.
Конкурстун шартына ылайык, жеңүүчү бир катар шарттарды аткарышы керек. Беш жыл ичинде авиапаркты заманбап беш учак менен камсыздашы зарыл. Андан сырткары, бир жыл ичинде миллион доллардан кем эмес каражатты компаниянын өнүгүшүнө жумшап, ишкананын 165 миллион сомдук карызын төлөшү керек.
Арыздарды кабыл алуу 7-июнда башталып 5-сентябрда аяктайт. 6-сентябрда аукцион өтүп, жеңүүчү аныкталат.
