БИШКЕК, 5-июн. — Sputnik. "Ас-салаам" кайрымдуулук фонду Кыргызстан мусулмандарынын дин башкармалыгына 5 миң даана Куран китебин тапшырды. Бул тууралуу муфтияттын маалымат кызматы билдирди.
Иш-чарага Кыргызстан мусулмандарынын дин башкармалыгынын жалпы эмгек жамааты, аталган фондун Кыргызстандагы президенти Нурмухаммад Миңбаев катышты.
"Кувейт мамлекетинен келишкен демөөрчүлөр жана "Ас-салаам" кайрымдуулук фонду биздин элге 5 миң даана Куран китебин белекке беришти. Биз жалпы кыргыз элинин атынан ыраазычылыгыбызды билдиребиз”, — дейт муфтияттын үгүт-насаат бөлүмүнүн башчысы Билалидин ажы Сайпиев.
Куран китеби улуу Рамазан айынын урматы үчүн тапшырылып, Куран жакынкы күндөрү муктаж болгон диний окуу жайларга жана Куран жаттатуучу медреселерге берилет.
