БИШКЕК, 1-июн. — Sputnik. Кыргызстанда кулчулукка кабылган кишилердин саны 27 миң 700 киши экени Глобалдык кулчулук индексинде (The Global Slavery Index) айтылат.
Изилдөөчүлөр бул тизмеге Казакстанда жана Россияда эмгек кулчулугуна кабылгандарды дагы кошкон. Рейтинг эл аралык жана жергиликтүү укук коргоо уюмдарынын үч ай жана жыл сайын чыгарган отчетторунун негизинде түзүлгөн.
Ошондой эле рейтингди чыгарууда ала качууга жана сексуалдывк кулчулукка мажбурланган кыздардын да саны киргизилген.
Коңшу Казакстанда кулчулукка кабылгандар 81 миң 600 болсо, Тажикстанда 54 миң 100, Түркмөнстанда 15 миң 800 киши экенин санап чыгышкан.
Кулчулукка кабылгандардын саны боюнча алдыда турган беш мамлекет:
- Индия — 18 миллион киши;
- Кытай — 3,39 миллион;
- Пакистан — 2,13 миллион;
- Бангладеш — 1,53 миллион;
- Өзбекстан — 1,23 миллион.
Изилдөөчүлөр дүйнө боюнча бүгүнкү күнү кулчулукка кабылгандардын дээрлик 60 пайызы дал ушул мамлекеттерге туура келерин айтышат.
Ал эми дүйнө жүзү боюнча 45,8 миллион киши кулчулукта жүрөт.
