БИШКЕК, 31-май — Sputnik. Жогорку Кеңештин төрагасы Чыныбай Турсунбеков Эл аралык балдарды коргоо күнүнүн алдында Москва районундагы Беловодск балдар үйүнө барып, анын абалы менен таанышты. Бул тууралуу парламенттин маалымат кызматы билдирди.
Ага ылайык, төрага аталган балдар үйүнө бүгүн, 31-майда барган. Келген меймандар үчүн балдар концерттик программа коюшту.
Спикер Москва районундагы балдар үчүн атайын түзүлгөн жети мекеменин директорлору менен жолугушту. Мекеменин жетекчилери балдар үйлөрүн материалдык-техникалык жактан камсыздоодогу жетишсизиктер боюнча көйгөйлөрдү айтышты.
Төрага өз сөзүндө КР өкмөтүнө балдар үйлөрүнүн, интернаттардын тарбиячыларынын эмгек акыларын жогорулатуу мүмкүнчүлүгүн кароо тапшырылганын билдирди. Ошондой эле Жогорку Кеңештин төрагасынын резервдик фондунан жалпы суммасы 200 миң сом акча каражатын берди.
