Бишкек шаарынын тургуну Азамат Рыскелдиев "Урал" мотоцикли менен "Москвичтин" тетиктеринен үч дөңгөлөктүү унаа курады. Ал аны жарым жыл жасаган.
"Канча экенин так айта албайм, бирок көп эле акча жумшалды. Автоунаам деле бар бирок, мотоцикл айдагандагы сезимдер такыр башкача болот. Ошентип бул үч дөңгөлөктүү унааны, тагыраагы трайкти жасадым", — дейт ал.
Анын айтымында, колго куралган трайк саатына 60-70 ылдамдыка чейин күүлөнө алат. Көчөдөн көрүп калышкан башка айдоочулар сигнал басып, суктанышат.
"Бул мотоциклди мен кайта жасап чыккандыктан анын документин тууралашым керек. Техникалык паспорту боюнча ал "Урал" үлгүсүндөгү эле мотоцикл", — дейт Рыскелдиев.
Учурда ал МАИге жана башка тийиштүү органдарга кайрылып, керектүү документтерди топтоп жатат.
