БИШКЕК, 30-май — Sputnik. Мугалимдердин кагып-силкүүсү окуучу кыздын өз өмүрүнө кол салышына түрткү болгон. Бул тууралуу Акыйкатчы институтунан билдирди.
Акыйкатчы Кубат Оторбаевдин наамына Бишкек шаарынын тургунунан арыз келип түшкөн. Ал жерде №64 мектеп-гимназиясынын суицидге барган кыз боюнча күнөөлүүлөрдү жазага тартуу өтүнүчү келтирилген.
Арызда суицидге барган кыз үстүбүздөгү жылдын 25-май күнү мугалимдер тарабынан катуу кагуу жегени баяндалат.
"Физика, тарых сабактарынын мугалимдери жана класс жетекчиси кызды "мал" деп атап, эч нерсени билбейсиң деп урушкан. Мындан сырткары айылдан келгенин айтып, чейректен эки чыгарабыз деп коркутушкан", — деп айтылат билдирүүдө.
Учурда суицидге барган окуучу ар кандай жараат менен №3 балдар ооруканасында дарыланууда.
Бул окуя боюнча Билим берүү жана илим министрлиги менен аталган мектептин жетекчилиги маалымат бере элек.
